တရုတ်ဝယ်လက်ကြောင့် မြန်မာ့တောဆင်ရိုင်းများ သတ်ဖြတ်ခံရမှု ပိုမိုများလာဟုဆို

Author: 
သီဟလွင် (မြစ်မခ)

တရုတ်နိုင်ငံ၏၀ယ်လိုအားများပြားလာမှုကြောင့် မြန်မာ့တောဆင်ရိုင်း များ သတ်ဖြတ်ခံရမှု ပိုမိုများပြားလာရကြောင်း သားငှက်ထိန်းသိမ်းရေးအဖွဲ့ (မြန်မာ)မှ တာဝန်ရှိသူများထံမှ သိရသည်။

ယခင်ကဆင်သတ်ဖြတ်မှုတွင် အစွယ်ကိုသာယူလိုခြင်းကြောင့် အစွယ် ပါသည့် အကောင်ကြီး ဆင်ထီးများသာ သတ်ဖြတ်ခံရလေ့ရှိသော်လည်း တရုတ်နိုင်ငံက ဆင်စွယ်တင်မကဘဲ သားရေ၊ အသား၊ အရိုးများပါ ၀ယ်လာ သောကြောင့် ဆင်မများဆင်ပေါက်များပါမကျန်သတ်ဖြတ် ခံနေရကြောင်း သားငှက်ထိန်းသိမ်းရေးအဖွဲ့ (Wildlife Conservation Soci ety) မှ သိရသည်။

“အဓိက က ၀ယ်လက်ကတရုတ်ပေါ့။ တရုတ်နိုင်ငံက မ၀ယ်ဘူးဆိုရင် တော့ ဆင်နဲ့ပတ်သက်တဲ့ သတ်ဖြတ်မှုတွေက နည်းသွားမှာပေါ့။ အဲတော့ တောရိုင်းတိရစ်္ဆာန် ထွက်ပစ်္စည်းတွေကို အဓိက၀ယ်နေတဲ့ တရုတ်နဲ့ တရား မ၀င် ကုန်သွယ်မှုတွေကို ရပ်တန့်သွားနိုင်အောင်နှစ်နိုင်ငံပူးပေါင်း ဆောင်ရွက် မယ်ဆိုရင်တော့ တောရိုင်းတိရစ်္ဆာန်ကုန်သွယ်မှုကတော့ နည်းသွားနိုင်တယ်” ဟု သားငှက်ထိန်းသိန်းရေးအဖွဲ့ ဦးအောင်ကျော်ကမတ်လ ၂၉ ရက်တွင် လားရှိုးမြို့၌ မီဒီယာများနှင့် တွေ့ဆုံစဉ်ပြောသည်။

မြန်မာနိုင်ငံတွင်သစ်တောဦးစီးဌာန၏ တရားဝင်စာရင်ဇယားများအရ ၂၀၁၀ ခုနှစ်မှ ၂၀၁၆ ခုနှစ်ထိဆင်သေဆုံးသတ်ဖြတ်ခံရမှုပေါင်း ၁၂၈ မှုထိ ရှိခဲ့ပြီး ၂၀၁၅-၂၀၁၆ ခုနှစ်များတွင် သတ်ဖြတ်ခံရမှု ပိုမိုများပြားလာကာ အများဆုံးဖြစ်ပွားသောဒေသမှာ ဧရာဝတီတိုင်းဒေသကြီးဖြစ်ကြောင်း သိရ သည်။

 

သတ်ဖြတ်နည်းများမှာလည်း ယခင်က တူမီးသေနတ်ကိုသာ အသုံးပြု လာမှုများမှ ဆင်တစ်ကောင်အား ၁၅ မိနစ်မှ မိနစ် ၃၀ အတွင်းသေဆုံး စေနိုင်သည့် တရုတ်နိုင်ငံထုတ် အဆိပ်ပြင်းများကို မြားတွင်လူးကာ ဖြုတ် သိမ်းတပ်ဆင်ကာ သယ်ဆောင်ရလွယ်ကူသည် ဒူးလေးများကို အသုံးပြုလာ ကြကြောင်း သိရသည်။

 

မြန်မာနိုင်ငံတွင် ၂၀၀၀ ခုနှစ်ဝန်းကျင်ကတော့ ဆင်ရိုင်းအရေအတွက် မှာ ၆၀၀၀ ခန့်ရှိသော်လည်း သစ်တောများပြုန်းတီးမှု၊ သတ်ဖြတ်ခံရမှု၊ ရေကာ တာများ တည်ဆောက်မှု၊ လူသားများ၏ စိုက်ပျိုးမြေများချဲ့ထွင်လာမှုနှင့် အတူ ဆင်ကောင်ရေ တဖြည်းဖြည်း လျော့နည်းလာကာ လက်ရှိ တော ဆင်ရိုင်းအရေအတွက်မှာ ၂၀၀၀ နှင့် ၃၀၀၀ အကြားသာ ရှိတော့ကြောင်း သားငှက်ထိန်းသိမ်းရေးအဖွဲ့မှ သိရသည်။

နိုင်ငံတကာတွင် စီးပွားရေးအရ တရားမ၀င်ကူးသန်းရောင်းဝယ်မှုများ အဖြစ်မူးယစ်ဆေး၊ လူကုန်ကူးမှု၊ လက်နက်မှောင်ခိုမှုများပြီးလျှင် တောရိုင်း တိရစ်္ဆာန်နှင့် ၎င်းင်းတို့၏ အစိတ်အပိုင်းများ ရောင်းဝယ်ဖောက်ကားခြင်းမှာ စတုတ်္ထမြောက်နေရာတွင်ရှိနေကြောင်း သိရသည်။       

  သီဟလွင် (မြစ်မခ)

Date: 
Tuesday, April 4, 2017