လူထုအတွက်ရွေးချယ်စရာအခွင့်အလမ်းတွေကို ဖန်တီးပေးဖို့လိုတယ်

Tuesday, October 24, 2017 - 13:30

မျိုးဆက်အားလုံးပါဝင်မည့်နိုင်ငံရေး ပါတီဖြစ်မြောက်ရေးအတွက် မွန်ပြည်နယ် စည်းရုံးရေးကော်မတီဖွဲ့စည်းရေးအစည်း အဝေးကို အောက်တိုဘာ ၂၂ ရက်က မော်လမြိုင်မြို့ရှိ Excellent  ခန်းမတွင် ကျင်းပပြုလုပ်ခဲ့ရာ မွန်ပြည်နယ် ၁၀ မြို့ နယ်မှ ကိုယ်စားလှယ်များတက်ရောက်ခဲ့ ကြကြောင်း သိရသည်။

ယင်းအစည်းအဝေးသို့နိုင်ငံရေးပါတီ ဖြစ်မြောက်ရေးဗဟိုကော်မတီမှဦးကိုကိုကြီး နှင့် အဖွဲ့တက်ရောက်ပြီး စည်းရုံးရေး၊ ဘဏ္ဍာရေးဆိုင်ရာတွေ့အကြုံများနှင့်ပါတီ  ဖွဲ့စည်းရန်ကြိုးပမ်းရခြင်းအကြောင်းရင်း တို့ကိုရှင်းလင်းပြောကြားခဲ့ကြသည်။

“ဒီမိုကရေစီရရှိရေးတို့ကြွေးကြော်ခဲ့ တာကို အကောင်အထည်ဖော်ဖို့ ကျွန်တော်တို့ ၈၈ မျိုးဆက်တွေနဲ့ မျိုးဆက် အသီးသီးကကြိုးပမ်းနေတာဖြစ်ပါတယ်။ ဒီမိုရေစီဆိုတာကဗဟိုဝါဒထွန်းကားအောင် လုပ်တာ၊ ပထမအဆင့်အနေနဲ့ကတော့ ပြည်သူတွေကသူတို့မကြိုက်တဲ့ စနစ်၊ သူတို့မကြိုက်တဲ့လူတွေကိုငြင်းပယ်တာ ကို မဲပေးပြီးတော့ ပြသခဲ့ပြီး ဖယ်ရှားပစ် ခဲ့ကြပါတယ်။ နောက်တစ်ဆင့်မှာကျ တော့ လူထုအတွက်ရွေးချယ်စရာအခွင့် အလမ်းတွေကို ဖန်တီးပေးဖို့လိုတယ်။ ပြည်သူတွေအတွက်ဒီမိုကရေစီအနှစ်သာ ရနဲ့ အညီရွေးချယ်စရာအခွင့်အလမ်းတွေ ပေါ်ပေါက်လာအောင်လို့မပြီးဆုံးသေးတဲ့ ဒီမိုကရေစီရေးကြွေးကြော်သံတွေကို အကောင်အထည်ဖော်နိုင်ဖို့ ကျွန်တော်တို့ နိုင်ငံရေးပါတီဖြစ်မြောက်ရေးကြိုးပမ်းနေ တာဖြစ်ပါတယ်”ဟု ဦးကိုကြီးကဆိုသည်။

နိုင်ငံရေးပါတီဖြစ်မြောက်ရေးတိုင်း နှင့် ပြည်နယ်ကော်မတီရုံးခန်းများကိုဖွင့် လှစ်လျက်ရှိရာဧရာဝတီတိုင်းနှင့် ပဲခူးတိုင်း ဒေသကြီးတို့တွင်ဖွင့်လှစ်နိုင်ခဲ့ပြီဖြစ်ကြောင်း သိရသည်။                

ဇော်မြင့်