အမျိုးသား ဒီမိုကရေစီ အဖွဲ့ချုပ်မှ အသက် ၃၀ နှစ်အောက် ပါတီဝင်များ ပါတီဝင်အဖြစ် ပြန်လည်လျှောက်ထားရမည်ဟုဆို

Tuesday, October 10, 2017 - 13:15

အမျိုးသား ဒီမိုကရေစီ အဖွဲ့ချုပ်မှ အသက် ၃၀ နှစ်အောက် လူငယ်ပါတီ ၀င်များ ပါတီဝင်အဖြစ် ပြန်လည် လျှောက်ထားရမည်ဖြစ်ကြောင်း အမျိုး သားဒီမိုကရေစီ အဖွဲ့ချုပ် ဒုတိယအကြိမ် လူငယ်ညီလာခံ ကျင်းပရေး ဗဟိုကော် မတီအဖွဲ့မှ သိရသည်။

ပါတီဝင်အဖြစ် ပြန်လည် လျှောက် ထားရခြင်းမှာ လူငယ်ပါတီ အင်အား သိရှိ စေရန် ညီလာခံ ကျင်းပရေးနှင့် လူငယ် ရေးရာနှင့် မူဝါဒများ ပိုမိုလုပ်ဆောင်နိုင် ရန်အတွက် ဖြစ်ကြောင်း သိရသည်။

““အသက် ၃၀ အောက်ဆိုရင် အကုန် ပြန်ဝင်မှ ရမယ်။ ဒါမှသာလျှင် လူငယ်အဖွဲ့ဝင်အဖြစ် တရားဝင် မှတ်ပုံ တင်လိုက်တော့မှ အဖွဲ့ဝင် မလျှောက်ထား ဘူး။ မှတ်တမ်းထဲမှာ မရှိဘူးဆိုရင် မဲပေး ပိုင်ခွင့်တို့ ၀င်ရောက်ရွေးချယ်ပိုင်ခွင့်တို့ မရှိတော့ဘူး။ အဲဒါကြောင့် ပြန်ဝင်ရမှာ ပါ”” ဟု အမျိုးသား ဒီမိုကရေစီအဖွဲ့ချုပ် ဒုတိယအကြိမ် လူငယ်ညီလာခံ ကျင်းပ ရေး ဗဟိုလုပ်ငန်း ကော်မတီ အဖွဲ့မှ ပြည်သူ့လွှတ်တော် ကိုယ်စားလှယ် တစ်ဦးဖြစ်သူ ဦးမောင်မောင်ဦးက ပြော သည်။

၂၀၁၄ ခုနှစ်တွင် ကျင်းပခဲ့သော ပထမအကြိမ် လူငယ်ညီလာခံ စာရင်း များအရ တစ်နိုင်ငံလုံးတွင် လူငယ်ပါတီ ၀င်အား တစ်သိန်းခန့်ရှိပြီး အဆိုပါ ပါတီ ၀င်များသည် ပါတီဝင်အဖြစ် ပြန်လည် လျှောက်ထားရမည် ဖြစ်ကြောင်း သိရ သည်။

““ကျွန်တော်တို့ပါတီက အသက် ၃၀ အောက်ကို ပါတီဝင်အဖြစ် သတ်မှတ် တာ ပါတီစတင်တည်ထောင်ကတည်းက သတ်မှတ်တာ။ ဒါပေမဲ့ ကျွန်တော်တို့က ၉၀ ခုနှစ်မှာ နိုင်ငံရေး အကျပ်အတည်းကို ဖြတ်သန်းလာတဲ့အတွက် လူငယ်ကို အသက် ၃၅ နှစ်ဆိုပြီးတော့ နိုင်ငံရေး အခြေအနေအရ သတ်မှတ်လိုက်တယ်။ အခုက နိုင်ငံရေး အခြေအနေက ပြန်လည် တည်ငြိမ်နေပြီ ဖြစ်တဲ့အတွက် ကမ်္ဘာ့စံနှုန်းအတိုင်း လူငယ်ကို အသက် ၃၀ အောက်ဆိုပြီးတော့ ပြန်သတ်မှတ် လိုက်တာပါ။ ဒုတိယအကြိမ် ညီလာခံ ကနေစပြီးတော့ အသက် ၃၀ ကျော် တာနဲ့ လူကြီးဖြစ်သွားပြီ””ဟု အမျိုးသား ဒီမိုကရေစီ အဖွဲ့ချုပ်ဗဟို အလုပ်အမှု ဆောင် ကော်မတီဝင် ဦးအောင်စိုးက ပြောသည်။

လူငယ်ပါတီ ၀င်အဖြစ် ပြန်လည် လျှောက်ထားရာတွင် လျှောက်လွှာ တစ်စောင်လျှင် ငွေ ၂၀၀ ကျပ်နှုန်းဖြင့် ၀ယ်ယူလျှောက်ထားရမည် ဖြစ်ပြီး လျှောက်လွှာအား ဒုတိယအကြိမ် လူငယ် ညီလာခံကျင်းပမည့် ရက်ပိုင်း အလိုတွင် လျှောက်လွှာများကို ခေတ်္တပိတ်သွားမည် ဖြစ်ပြီး ကျန်ရက်များတွင် လျှောက်လွှာ များအား အကန့်အသတ်မရှိ လက်ခံသွား မည်ဖြစ်ကြောင်း သိရသည်။   ဖြိုးအောင်