ကိုယ့်လက်ပေါ် မီးပွားကျမှ ပူမယ်ဆိုတဲ့ စိတ်ဓာတ်တွေ ဖျောက်သင့်ပြီ

နာဂစ်မုန်တိုင်းဒဏ်ခံခဲ့ရသည့် ဘိုကလေးမြို့နယ် ပလော့ကျေးရွာအုပ်စု ၁၀ရွာနှင့် ညီနောင်ဝကျေးရွာအုပ်စု ခုနစ်ရွာမှ ဒေသခံပြည်သူများက နောက် တစ်ကြိမ် မုန်တိုင်းအန်္တရာယ်ကျရောက်ခဲ့ပါက အမြန်ပြောင်းရွှေ့နိုင်ရန် ကျေးရွာ ၁၇ရွာ ကို ချိတ်ဆက်ဖြတ်သန်းပြီး ဘိုကလေး ကဒုံဧရာကားလမ်းသို့ ထွက်ခွာနိုင်မည့် အကျယ် ၁၂ ပေ၊ အရှည် ၄ မိုင်ခန့်ရှိ ကွန်ကရစ်လမ်း ဖြစ်မြောက်ရေးအတွက် ဖေဖော်ဝါရီ ၂၄ ရက်တွင် အောင်လှိုင် ကျေးရွာ ဘုန်းတော်ကြီးကျောင်း၌ ကိုယ်ထူကိုယ်ထ ကားလမ်းနှင့် တံတားများ ဖြစ် မြောက်ရေးကော်မတီ ဖွဲ့စည်းခဲ့ကြောင်း သိရသည်။

ယင်းကိုယ်ထူကိုယ်ထ နာဂစ်ထွက်ပေါက်စီမံကိန်းအား တောင်သူလယ် သမားအရေးဆောင်ရွက်သူ ဦးဇော်ရမ်းက ကမကထပြုလုပ်ဆောင်ရွက်ခြင်း ဖြစ်ပြီး အောင်လှိုင်ကျေးရွာဘုန်းကြီးကျောင်း ဆရာတော်နှင့် nile  ဆောက် လုပ်ရေး လုပ်ငန်းရှင် ဦးသာအေးတို့အား နာယကအဖြစ် တင်မြှောက်ခဲ့ ကြသည်။

““ဘိုကလေးက ကျွန်တော့်ဇာတိရွာပါ။ ဒါပေမဲ့ ကျွန်တော်က ရန်ကုန်မှာ နေပါတယ်။ နာဂစ်ဖြစ်တုန်းက ကျွန်တော်မရှိပါဘူး။ အခု ဆယ်နှစ်ကြာ လာတဲ့အထိ ထွက်ပေါက်လမ်း မဖောက်နိုင်သေးဘူး။ ဒီကလူတွေရဲ့ စိုးရိမ်မှု ကို ဘယ်သူမှ ဖြေဖျောက်မပေးနိုင်သေးဘူး။ ပြောချင်တာက ကျွန်တော်တို့ တိုင်းပြည်မှာ ကိုယ့်လက်ပေါ် မီးပွားကျမှပူမယ်။ သူများလက်ပေါ် မီးပွား ကျတာကတော့ ဘာသိဘာသာပဲ နေမယ်ဆိုတဲ့ စိတ်ဓာတ်တွေရှိ နေသေး တယ်။ ဒီစိတ်ဓာတ်တွေကြောင့် နှစ်ငါးဆယ် ခြောက်ဆယ်လောက် အာဏာ ရှင်တွေ လုပ်ချင်တိုင်းလုပ်တာကို ခံခဲ့ရတာ။ ဒါကြောင့် ကိုယ့်လက်ပေါ် မီးပွားကျမှပူမယ်ဆိုတဲ့ စိတ်ဓာတ်တွေဖျောက်သင့်ပြီလို့ ပြောချင်ပါတယ်””ဟု ဦးဇော်ရမ်းက ပြောသည်။

အဆိုပါ ကိုယ်ထူကိုယ်ထစီမံကိန်းကို နိုင်ငံတော်အစိုးရနှင့် ဧရာဝတီ တိုင်း အစိုးရအဖွဲ့ တာဝန်ရှိသူများထံ တင်ပြထားပြီးဖြစ်ကြောင်း၊ မြေတူး စက်ယန်္တရားနှင့် အကူအညီများကို ဆောက်လုပ်ရေးလုပ်ငန်းရှင်ဦးသာအေး က ထောက်ပံ့ကူညီသွားမည်ဖြစ်ကြောင်းသိရသည်။               ဇော်မြင့်

 

Date: 
Tuesday, February 27, 2018