တိုက်ကြီးမြို့နယ်၊ မင်းလှဝကျေးရွာသားများ၏နစ်နာ ခံစားနေရမှုများအတွက် သတင်းစာရှင်းလင်းပွဲပြုလုပ်

ရန်ကုန်တိုင်းဒေသကြီး၊ တိုက်ကြီး မြို့နယ်၊ မင်းလှဝကျေးရွာအုပ်စု၊ မင်းလှ ၀ကျေးရွာရှိရွာသူရွာသားများ၏ ကျန်းမာ ရေး၊ နေထိုင်ရေးနှင့် လယ်ယာမြေအခက် အခဲများကြုံတွေ့နေရမှုသတင်းစာရှင်းလင်း ပွဲကို မေ ၂၀ ရက် နေ့လယ် ၁၂ နာရီတွင် အဆိုပါကျေးရွာရှိဝိသုတ်္တာရာမ ကျောင်း တိုက်ဝင်းအတွင်း၌ပြုလုပ်ခဲ့ရာကျေးရွာနေ ပြည်သူ၁၀၀ဦးခန့်တက်ရောက်ခဲ့ကြသည်။

ရှင်းလင်းပွဲတွင် မင်းလှဝကျေးရွာ အတွင်းမှ ဖြတ်သန်းတည်ဆောက် ထား သောဘောလယ်မြစ်ဖြတ်ရေပေါ်သောင် တံတား၏ဘေးဝဲယာတွင်နေအိမ်ဆောက် လုပ်နေထိုင်သူများကို မူလမြေပိုင်ရှင် များဟု ဆိုသူများက နိုင်ငံတော်၏ သိမ်း ဆည်းခြင်းခံပြီး အစားမြေများရယူထား ပြီးပါလျက် လာရောက်  တားမြစ်နေ ခြင်းနှင့် ကျေးရွာအုပ်ချုပ်ရေးမှူးက လည်း ဆောက်လုပ်ထားပြီးသည့် နေအိမ် အဆောက်အအုံများ (ဘော်ဒါဆောင်များ အပါအ၀င်)ကို တစ်ပြေးညီတားမြစ်ဖျက် သိမ်းနိုင်ခြင်းမရှိဘဲ ခွဲခြားတားမြစ်နေခြင်း ကိုကျေနပ်မှုမရှိပါကြောင်း၊ Gas  ဖြင့် လည်ပတ်သော ဆန်စက် နှစ်လုံးကို ကျေးရွာအတွင်း လူနေအိမ်ခြေများ အကြား တည်ဆောက်ခွင့်ပြုထားသဖြင့် ယင်းဆန်စက်မှလွင့်ပျံ့ထွက်ရှိနေသော အမှုန်အမွှားများကို ရှူရှိုက်နေရသော ကြောင့် တီဘီရောဂါခံစားနေကြရသည့် အပြင် မြစ်ကမ်းဘေး၌ တည်ထားသော ယင်းဆန်စက်များသည် စွန့်ပစ်အမှိုက်နှင့် အညစ်အကြေးများကို မြစ်အတွင်းသွန် ချနေသောကြောင့် ကျေးရွာသုံးမြစ်ရေ အားသန့်ရှင်စွာ အသုံးပြုခွင့်မရရှိသဖြင့် စစ်ဆေးတားမြစ် ပေးစေလိုကြောင်း၊ ကျေးရွာအတွင်း၌  အုတ်ဖုတ်လုပ်ငန်း များကို လုပ်ကိုင်ခွင့်ပြုထားသောကြောင့် လယ်ယာမြေများနှင့် ကျေးရွာလမ်းကို ပျက်စီးစေသဖြင့် တားမြစ်ပေးစေလို ကြောင်း၊ လျှပ်စစ်မြစ်ရေတင်စီမံကိန်းမှ ရေကို လယ်သမားများက ကိုယ့်အား ကိုယ်ကိုး ရေသွယ်မြောင်းဖောက်လုပ်၍   လယ်များသို့ ရေပို့လွှတ်နေခြင်းအား ယခင်ကျေးရွာအုပ်ချုပ်ရေးမှူးက ကျေး ရွာ  ဆက်လမ်းပြုလုပ်ရန်ဟုဆိုကာ ရေ သွယ်မြောင်းကို မြေဖို့ခဲ့သဖြင့် မူလ ရေသွယ်မြောင်းပြန်လည် ပြုလုပ်ပေးစေ လိုကြောင်း၊  ခေတ်အဆက်ဆက်က ကျေးရွာ စားကျက်မြေအဖြစ်သတ်မှတ်  ထားရှိခဲ့သော မြေကို အကျဉ်းဦးစီးဌာန ရဲဘက်အလုပ်စခန်းကချဲ့ထွင်သိမ်းယူထား မှုကြောင့် ကျွဲနွားများ၏စားကျက်မြေ ပျောက်ဆုံးနေသဖြင့် ပြန်လည်ပေးအပ်  စေလိုပါကြောင်း ကျေးရွာသူရွာသား ကိုး ဦးကဦးဆောင်ရှင်းလင်းပြောကြားခဲ့သည်။

ရှင်းလင်းသည့်အကြောင်းအရာများ နှင့် ပတ်သက်၍ ဌာနဆိုင်ရာများသို့ လည်း စာဖြင့်တင်ပြထားခဲ့ကြပြီး အရေး ယူဆောင်ရွက်ပေးမှုမရှိသေးကြောင်း သိရကာ ယင်းအကြောင်းအရာများနှင့် ပတ်သက်၍ ကျေးရွာအုပ်ချုပ်ရေးမှူးသို့ ဆက်သွယ်မေးမြန်းသော်လည်း ဖုန်း လက်ခံဖြေကြားမှုမရှိခဲ့ပေ။

မင်းလှဝ ကျေးရွာအုပ်စုတွင် ကျေး ရွာကိုးရွာပါဝင်ပြီး၊ အိမ်ထောင်စု ၅၀၀ ကျော်၊ လူဦးရေ ၂၀၀၀ ကျော်နေထိုင် လျက်ရှိပြီး တံတားနယ်မြေအတွင်းဆောင်  လုပ်ထားသည့် အိမ်မြေ ၁၂ လုံးခန့်ရှိကာ  ယင်းအိမ်ထောင်စုများသည် မင်းလှဝ ကျေးရွာဒေသခံမြေယာမဲ့မိသားစုများ ဖြစ်ကြောင်း သိရသည်။

ခိုင်းလင်းဇော် (လှိုင်သာယာ)

 

Date: 
Tuesday, May 29, 2018