ရာထူးတိုးမျှတရေးအတွက် နည်းပညာ၊ ကွန်ပျူတာနှင့်ဆေးဘက်ဆိုင်ရာ တက္ကသိုလ်ဆရာ/ဆရာမများ နိုင်ငံတစ်ဝန်း ဖဲကြိုးပြာကမ်ပိန်း ပြုလုပ်

Author: 
သီဟလွင် (မြစ်မခ)

ပညာရေးဝန်ကြီးဌာန လက်အောက် ရှိ ဦးစီးဌာနအချို့တွင် ချမှတ်ထားသော ရာထူးတိုး မူဝါဒများမှာ မျှတမှုမရှိသော ကြောင့် ဆရာ၊ ဆရာမများက ရာထူးတိုး မျှတရေး၊ နစ်နာမှုများ ဖြေရှင်းပေးရေးတို့ အတွက် ဖဲကြိုးပြာ ကမ်ပိန်းကို ဇူလိုင် ၃၁ ရက်တွင် ပဲခူးတိုင်းဒေသကြီး၊ ပြည်မြို့ ရှိ နည်းပညာ တက္ကသိုလ်၌ ပြုလုပ်ခဲ့ ကြောင်း သိရှိရသည်။

 ပြည်နည်းပညာ တက္ကသိုလ်၌ စာသင်ချိန်၊ ကျောင်းတက်ချိန်များတွင် အပြာရောင် ဖဲကြိုးများကို တပ်ဆင်ကာ ရာထူးတိုး မျှတရေးအတွက် တောင်းဆို နေကြကြောင်း သိရသည်။

““အဓိက ရာထူးတိုးရေးအတွက် မဟုတ်ဘူး၊ ရာထူးတိုး မျှတရေးအတွက် တောင်းဆိုတာ။ လုပ်သက်တူ၊ ဘွဲ့အတူတူ ချင်းတောင် ရာထူးတိုး မူဝါဒတွေက မမျှတတော့ လက်ထောက် ကထိကနဲ့တင် ဘ၀ဆုံးဖို့ ဖြစ်လာတယ်။ အဲဒါက အနာဂတ် ပညာရေးအတွက် မကောင်းဘူး”” ဟု ပြည်နည်းပညာ တက္ကသိုလ်မှ လက် ထောက်ကထိက ဦးရဲမင်းသိန်းက ပြော သည်။

နည်းပညာ တက္ကသိုလ်များနှင့် ကွန်ပျူတာ တက်္ကသိုလ်များမှ သရုပ်ပြ  ဆရာများမှာ လက်ထောက် ကတိက ရာထူး သို့ ဆယ်စုနှစ် တစ်စု ကြာသည် အထိ အတိုးမခံရသူ အများအပြား ရှိနေ ပြီး ရာထူးတိုး မူဝါဒများ မညီမျှမှုကြောင့် အခွင့်အရေး ဆုံးရှုံးမှုများလည်း ရှိနေ ကြောင်း ကမ်ပိန်းပြုလုပ်သူ ဆရာ၊ ဆရာမ များထံမှ သိရသည်။

““၀န်ကြီးဌာနတူတယ်၊ ဦးစီးဌာနပဲ ကွဲတယ်။ လုပ်သက်တူ၊ ရာထူးတူပဲ၊ ရာထူးတိုး မူဝါဒ မတူတော့ မမျှတဘူး။ ကျွန်မ လုပ်သက် ၈ နှစ်ရှိပြီ။ တချို့ဆို ၁၀ နှစ်ကျော်နေပြီ။ မျှမျှတတ ဖြစ်စေချင် တယ်။ ပိုလည်း မလိုချင်ဘူး။ လိုလည်း မလိုချင်ပါဘူး။ အားလုံး တန်တူညီမျှဖို့ လိုချင်တာပါ”” ဟု ပြည်နည်းပညာ တက္ကသိုလ်မှ သရုပ်ပြဆရာမ ဒေါ်စုသဲဆွေ က ပြောသည်။

ပြည်နည်းပညာတက်္ကသိုလ်၌ အဆိုပါ လှုပ်ရှားမှုကို ထောက်ခံသော ကျောင်းသား၊ ကျောင်းသူများကလည်း ဖဲကြိုးပြာများ တပ်ဆင်ကာ ပူးပေါင်း ပါဝင်မှုများ ပြုလုပ်ခဲ့သည်။

““အခု မူဝါဒက လိုက်နာရမယ့် သူကြားမှာ ဘယ်လိုမျှတမှု မရှိဘူးပေါ့ နော်။ အဲဒါ ဥပဒေ မဟုတ်ဘူး။ ဥပဒေ မဟုတ်ဘဲ အမိန့်ဆန်နေတယ်။ ပြည်သူ တင်မြောက်ထားတဲ့ ဒီမိုကရေစီ အစိုးရမှာ တရားမျှတမှုရှိတဲ့ အမိန့်တွေကို ကျွန်တော်တို့ ကိုယ်တိုင်လည်း မထောက် ခံဘူး။ အဲဒီအတွက် ၀န်းရံတယ်”” ဟု ပြည် နည်းပညာ တက္ကသိုလ်ကျောင်းသား သမဂ်္ဂမှ ကျောင်းသားကိုယ်စားလှယ် ကိုရန်ကျော်က ပြောသည်။

     သီဟလွင် (မြစ်မခ)

Date: 
Tuesday, August 1, 2017