ဆောင်ဒူကျေးရွာ၌ ကျေးရွာစည်းကမ်းဖောက်ဖျက်သည်ဟုဆိုကာ ရွာသူ၊ရွာသားအချို့က မိသားစုတစ်စုကိုရွာမှ နှင်ထုတ်ရန်ကြိုးပမ်းနေ

ကယားပြည်နယ်၊ ဒီးမော့ဆိုမြို့နယ် လိုဘာခိုကျေးရွာအုပ်စု ဆောင်ဒူကျေးရွာ ၌ ကျေးရွာကသတ်မှတ်ထုတ်ပြန်သွား သောစည်းကမ်းဖောက်ဖျက်သည်ဟုဆိုကာ ကျေးရွာသူ၊ ကျေးသားအချို့က အဆိုပါ ကျေးရွာနေမိသားစုတစ်စုကို ကျေးရွာမှ ရွှေ့ပြောင်းထွက်ခွာသွားရန်မောင်းထုတ်မှု ဖြစ်ပွားနေကြောင်း သိရသည်။

ဆောင်ဒူကျေးရွာမှ ရွာသူ၊ ရွာသား အချို့၏ ဖိအားပေးကာ ကျေးရွာမှ ထွက် ခွာသွားရန် နှင်ထုတ်ခြင်းခံနေရသူမှာ ဒေါ်မူပိုင့်နှင့် မိသားစုဖြစ်သည်။ ဒေါ်မူပိုင့် သည်အဆိုပါကျေးရွာဇာတိဖြစ်ပြီး အသက် ၅၅ နှစ်ရှိပြီဖြစ်သည်။ ဒေါ်မူပိုင့် သည် ဟိုဝမ်ကျေးရွာသားဦးလာဟုန်းနှင့် အိမ်ထောင်ပြုပြီးနောက် ဆားယူ၊ ပိုးယူ၊ ဒူးရီ၊ ခင်ထူးအမည်ရှိသားလေးယောက် နှင့် မူထိုက်၊ မအိုအမည်ရှိသမီးနှစ်ယောက် စုစုပေါင်းသား၊ သမီးခြောက်ယောက်ထွန်း  ကားခဲ့သည်။ ၎င်းင်းတို့ မိသားစုမှာ တောင် ယာလုပ်ငန်းဖြင့်အသက်မွေးဝမ်းကျောင်း ပြုသူများဖြစ်ကြသည်။

၂၀၁၈ ခုနှစ် စက်တင်ဘာလ ၁၃ ရက် ညနေ ၆ နာရီခွဲအချိန်ခန့်တွင်ဖရူဆို မြို့မရဲစခန်း၊ ဒီးမော့ဆိုမြို့မရဲစခန်းတို့မှ ရဲတပ်ဖွဲ့ဝင်အချို့နှင့် ကျေးရွာသားအချို့ တို့ ဆောင်ဒူကျေးရွာရှိ ဦးလာဟုန်း၊ ဒေါ်မူပိုင့်တို့၏ နေ့အိမ်အားမူးယစ်ဆေး ၀ါးသတင်းအရဟုဆိုကာဝင်ရောက်ရှာဖွေ ပြီး နေအိမ်အိပ်ခန်းအတွင်း၌ WY စိတ် ကြွဆေးပြား ၂၃ ပြားရှာဖွေတွေ့ရှိသည် ဟုဆိုလျက် အိမ်ရှင်ဦးလာဟုန်း ၅၅ နှစ် ကို ဖမ်းဆီးစစ်ဆေးလျက်ရှိသည်။

ထိုသို့ခင်ပွန်းဖြစ်သူ ဦးလာဟုန်း မူးယစ်ဆေးဝါးမှုဖြင့် ဖမ်းဆီးပြီးနောက် မကြာမီကာလမှာပင် ကျေးရွာစည်းကမ်း ဖောက်ဖျက်သည်ဟူသော စွပ်စွဲချက်ဖြင့် ကျေးရွာသူ၊ ကျေးရွာသားအချို့တို့က ဒေါ်မူပိုင့်မိသားစုကို ကျေးရွာမှ ထွက် ခွာသွားရန် ဖိအားပေးနှင်ထုတ်မှုဖြစ်ပေါ် လာခဲ့သည်။ ကျေးရွာမှထွက်ခွာရပါက နေအိမ်ကိုပါ ဖျက်ဆီးရွှေ့ပြောင်းရမည် ဟုဆိုသည်။ ဆောင်ဒူကျေးရွာနေရွာသူ၊ ရွာသားအချို့တို့က ၂၀၁၈ ခုနှစ်၊ သြဂုတ် လ ၂၆ ရက်တွင် သတ်မှတ်ထုတ်ပြန် ထားသည်ဆိုသော စည်းကမ်းချက်မှာ ၁၄ ချက်ရှိပြီး အဆိုပါစည်းကမ်းချက်များ အနက်မှအချက်တစ်ချက်မှာ “ကျေးရွာ အတွင်းမူးယစ်ဆေးဝါးရောင်းဝယ်ဖောက် ကားခြင်းမပြုရန်၊ ရောင်းဝယ်ဖောက်ကား ခြင်းပြုလုပ်ပါက ကျေးရွာအတွင်းမှ နယ် နှင်ဒဏ်ခံစေပြီး ကျေးရွာဆေးကြောရန် အတွက် နွားမကြီးတစ်ကောင်နှင့် ၀က်ထီး ကြီးတစ်ကောင်ပေးလျော်ရမည်” ဟူသော  စည်းကမ်းချက်တစ်ခုပါဝင်သောဟူသည်။

“ဦးလာဟုန်းကို ဖမ်းဆီးထားပြီး အမှုစွဲဆိုတင်ပို့ခြင်းမရှိသေးသလိုသက်ဆိုင်  ရာပြစ်မှုတစ်စုံတစ်ရာပြစ်ဒဏ်ချမှတ်ခြင်း လည်းမရှိသေးပါဘူး။ မိမိတို့သဘော ဆန္ဒအလျှောက်ရွာမှ နှင်ထုတ်မှုပြုခြင်း ဟာ ဥပေဒမဲ့ပြုကျင့်ရာရောက်ပြီး တရား ဥပဒေစိုးမိုးရေးကိုလည်းထိခိုက်စေပါတယ်။ကျေးရွာသူ၊ ကျေးရွာသားအချို့ထုတ်ပြန် ထားတဲ့ ရွာမှနယ်နှင်ဒဏ်ခံစေရမည်ဆိုတဲ့ စည်းကမ်းချက်ကြီးကလည်း ဖွဲ့စည်းပုံ အခြေခံဥပဒေပါ နိုင်ငံသားများ၏ မူလ အခွင့်အရေး၊ ကမ်္ဘာ့လူ့အခွင့်အရေးကြေ ညာစာတမ်းပါအခွင့်အရေးတွေကိုဖောက် ဖျက်ကျူးလွန်ရာကျရောက်တဲ့အပြင် လူ့ ဂုဏ်သိက်္ခာကိုလည်း ထိခိုက်စေနိုင်ပါ တယ်” ဟုတရားလွှတ်တော်ရှေ့နေတစ်ဦး ကပြောသည်။

“ဒီလိုဖြစ်ရပ်မျိုးတွေကို ကယားပြည် နယ် ဒီးမော့ဆိုမြို့နယ်အနောက်ခြမ်းကျေး ရွာအချို့နဲ့ ရှမ်းပြည်နယ် (တောင်ပိုင်း) ဖယ်ခုံမြို့နယ်အနောက်ခြမ်းကျေးရွာအချို့ မှာ တွေ့ရဖူးရှိတယ်။ ကျေးရွာစည်းကမ်း ဖောက်ဖျက်တယ်ဆိုပြီး ကျေးရွာက တစ် မိသားစုလုံးကို နှင်ထုတ်တယ်ဆိုတာတည် ဆဲဥပဒေအရ၊ လူမှုရေးအရမဖြစ်သင့် တဲ့ ကိစ္စကြီးတွေပါ”ဟုနယ်မြေခံသတင်းသမား တစ်ဦးကပြောသည်။

ကြီးမြင့်နိုင်(လွိုင်ကော်)

 

Date: 
Tuesday, October 23, 2018