မြစ်ရေပေးဝေရေးလုပ်ငန်းအရှုံးပေါ်နေသောကြောင့်ဟုဆိုကာ ရေမီတာခများ တိုးမြှင့်ကောက်ခံမည်

ပဲခူးတိုင်းဒေသကြီး၊ ပြည်မြို့၌ မြစ်ရေကိုသန့်စင်ကာ မြို့ပေါ်ရှိရပ်ကွက် အချို့ထံ ရေပေးဝေခြင်းလုပ်ငန်းမှာ အရှုံးပေါ်လျက်ရှိသောကြောင့်ရေမီတာခ တိုးမြှင့်ကောက်ခံရန် ပြင်ဆင်လျက်ရှိ ကြောင်း ပြည်မြို့ စည်ပင်သာယာရေး အဖွဲ့မှ သိရှိရသည်။

အဆိုပါစီမံကိန်းအား ဂျပန်နိုင်ငံ JICA  ချေးငွေဖြင့် ဆောင်ရွက်နေခြင်း ဖြစ်ပြီး မြစ်ရေအား ပြန်လည်သန့်စင် ရာတွင်အသုံးပြုသောဆေးဝါး ကုန်ကျ စရိတ်များပြားခြင်း၊ ရေပိုက်လိုင်းအသစ် များ ပြန်လည်တပ်ဆင်ရခြင်းနှင့် အခြား ကုန်ကျစရိတ်များ များပြားကာ အရှုံးပေါ် နေသောကြောင့် တိုးမြှင့်ကောက်ခံရန် စီစဉ်နေရခြင်းဖြစ်ကြောင်း  သိရသည်။

““စုစုပေါင်း JICA ချေးငွေ ကျပ် ၁၄၇၄ ဒသမ ၃၁၇ သန်းနဲ့ ဆောင်ရွက် နေတာပါ။ ချေးငွေတွေကို ပြန်ဆပ်နိုင်ဖို့ ဆိုရင် ၀င်ငွေနဲ့ထွက်ငွေ မျှတဖို့လိုပါ တယ်။ အဲဒါမှ လုပ်ငန်းက လည်ပတ်နိုင် မှာပါ””ဟု ပြည်မြို့နယ် စည်ပင်သာယာ ရေးအဖွဲ့မှ အမှုဆောင်အရာရှိသူရမြင့်သူ ကပြောသည်။

မြို့ပေါ်၌ ရေမီတာတိုင်သုံးစွဲသည့် ရပ်ကွက်ငါးခုရှိပြီး ၂၀၁၇-၁၈ ဘဏ္ဍာ နှစ်အတွက် မြို့ရေပေးရေးကုန်ကျငွေ စုစုပေါင်းမှာ ကျပ် ၂၂၃ သန်းကျော် ဖြစ်ကာ ပြန်လည်ရရှိငွေမှာ ကျပ် ၁၁၃ သန်းကျော်ဖြစ်သဖြင့် အရှုံးပေါ်နေ ကြောင်း သိရသည်။

ယခုပြောင်းလဲသတ်မှတ်မည့် ရေ မီတာခတစ်ယူနစ်လျှင် ၃၀၀ ကျပ်နှုန်းဖြင့် ကောက်ခံမည်ဆိုလျှင်ပင် အရှုံးပေါ် နေသေးကြောင်း မြို့နယ်စည်ပင်သာယာ ရေးအဖွဲ့မှ သိရသည်။

““ပြည်သူလူထုကတော့ ပေးနေရတဲ့ ဒီနှုန်းထားပေါ်မှာများနေတယ်လို့ထင်တယ်။ ဒါပေမဲ့ ကျွန်တော်တို့ပေးနေရတဲ့ ၀န် ဆောင်မှုအရ၊ သုံးထားတဲ့ဆေးဝါးအရ၊ အခြားစရိတ်အရရော ရှုံးပါတယ်။ ကျွန် တော်တို့က ပထမအဆင့် ပြင်ဆင်သတ် မှတ်မယ်ဆိုရင်တော့ ဆုံးရှုံးလာတဲ့ငွေ Amount ကို တခြားဘတ်ဂျက်တွေကနေ ပြန်လည်သုံးစွဲရမယ့်သဘောတော့ရှိတယ်။ ဒါကို ပြည်သူလူထုက နားလည်ပေးနိုင် ဖို့ လိုပါတယ်””ဟု ပဲခူးတိုင်းဒေသကြီး လွှတ်တော်ကိုယ်စားလှယ်ဦးကျော်ဇေယျ ကပြောသည်။ဂျပန်ချေးငွေ (JICA ODA LOAN)  ဖြင့် ၂၀၁၇ ခုနှစ်မှစတင်ကာ မြို့ရေပေးရေးအဆင့်မြှင့်တင်ခြင်းလုပ်ငန်း၊ ရေ ဖြန့်ဝေပိုက်လိုင်း ၁၀ လိုင်းနှင့် ရေ မီတာ အစားထိုးလဲလှယ်တပ်ဆင်ခြင်း လုပ်ငန်းများအတွက် ကျပ် ၁၄၇၄ဒဿမ ၃၁၇သန်းဖြင့် စတင်ခဲ့ပြီး ၁၀ နှစ်အတွင်း အတိုးသာလျှင် ပေးဆပ်ရမည်ဖြစ်ကာ ၃၀ နှစ်အတွင်း အတိုးရော၊ အရင်းပါ ပေးဆပ်ရမည်ဖြစ်ပြီး   အတိုးနှုန်းမှာ ၀.၀၁ ရာခိုင်နှုန်းဖြစ်ကြောင်း သိရသည်။

သီဟလွင်(မြစ်မခ)

 

Date: 
Tuesday, June 5, 2018